[center] السلام عليكم
اليوم شاعر معروف , ماهو عادتي أجيب شاعر معروف
لكنه خف الوهج اللي كان عليه الشاعر سابقا
وهو رجل يستاهل
والقصيدة -مثل كل قصائدة- تستاهل
واذا ماكنت واهم ,, خالد عبدالرحمن , أبونايف ,,,, مغنيها
وأسمها
الرسالة
والشاعر هو
رشيـــد الدهام
= = =
يابعد كل الرسايل هالرساله
توّها ماكملت عمر الطفوله
طفلةٍ فيها العطر ياطول باله
وده ايفوح .. ويبوح وهي خجوله
مثل طبع اللي كتبها من دلاله
في مسافات الزمن واربع فصوله
دالهٍ لاجيت اشوفه .... شاف حاله
ماتهيـّـا منـْـه لو نظره عجوله
صار عندي راس مال , وراس ماله
ضحكةٍ معها عقلْ بس امهبوله
لاضحك في مسمعي كني قباله
كني اقطف ورده وعقده ولوله
واحبس ابعيني خيالٍ من جماله
وارفع لسمعي يديْ كني بـ اطوله
وارسم لزوله شكلْ يشبه خياله
في خيالي ... والا انا ماشفت زوله
كلما حرّمْته .. القاني حلاله
وكلما عنـْـه ابتعد قرّبت أنوله
كنت افكر مره القى لي بداله
دام وصله صعب .... والاصعب وصوله
قلت :يالله نفترق ... كلن وفاله
قال:يالله.قلت:لحظه!من يقوله؟
أطري الفرقا وأنا مامن صماله
وأدري انْ فرقاه ماهيب بهالسهوله
كم عذولٍ قد عذلني في وصاله
ومن عذلني قلت له نفس المقوله
مايخلـّـي حاله الرجال حاله
غير بنتٍ في مواقفها رجوله
!!
= = =
ربي يستر عليك يابن دهام
مااعتقد تحتاجون لتعليقي
ورشيد معروف
طبعا البيتين الاولين يوصف رسالتها ما يوصف البنت
والدليل يوم قال ,, (( مثل طبع اللي كتبها من دلاله )) ويقصد أن الرسالة
مثل طبع كاتبتها ,, طفلة وفيها خجل ودلال
الشطر الثاني من البيت الخامس شرح لكلمة (( راس ماله )) والمقصود هنا
راس مال البنت >>> ضحكةٍ فيها عقل بس امهبولة
ويكفيكم بس الحركات اللي يسويها وهو قاعد يكلمها يرفع يدينه ومدري وش يسوي
حتى استغفر الله بدأ يحللها لنفسه ,, وهذا حسب مفهومي طبعا
لكن من جد ,, من جد
البنت جامدة ,, ماهم بنات هاليومين
تقولها بمشي عنك خلاص ,, ثاني يوم تدق عليك // خلاص سامحني
موضوع: ::::: هالبنت واقفه موقف رجال 
الأربعاء يوليو 02, 2008 11:44 am
